بدي ارجع طفل صغير
مش قاعد عم بقول يا ليت الشباب يعود يوما و لا انو يجيبولي معهم بكيت دخان و بتناغش و بنهف
اذا كنت بتحب الاطفال او ما بتحبهم بتعرف لو انك راقبتهم انو بيحبو يكتشفو و بيحبو يدورو على اصل الاشي و كل ما يتعلق فيه.
مش زي العمر الاكبر اللي بفكر كل اشي مسلمات
و لما يسأل ليش هيك بيتجاوب…..بيكفي فلسفة! او لا تسأل اسئلة ما الك فيها او شو قلة هالحيا بتظلك تسأل! كأنو السوأل حرام!
طيب لما تربي للطفل الصغير هيك و تنكسو و تعوده انو ما يسأل و
لا يبحث ولا يدور كمان بتعودو انو ما يتثقف ولا يدور على المعلومات و اصل
المعلومات. او يصير عالم بالمستقبل او على الاقل شاطر بدراسته.
انا مش قاعد عم ببالغ
يعني خلينا نتخيل عقل الطفل ما احلاه …….نعمل سيناريو صغير J
انا قاعد بفطر الصبح مع بناتي و زوجتي, بتيجي زوجتي بتقوم
تحضر سندويشات المدرسة للبنات و هيه لافيتلنا ضهرها و ا حنا لساتنا بنحش و
بنوكل انا فجأة برتفع بالهوا و بطير……..شو رأيكو راح يصير؟ و شو ردة فعل
البنات الصغار و الام؟؟؟؟
البنات الصغار راح يقولو ياي ماما شوفي بابا عم بيطير ياي كيف سويت هيك بابا علمني؟
بتيجي الام بتلف وجهها عاد و بتشوفني طاير يمكن تقعد تصيح و تلم علينا الجيران او تموت خوف “بعيد الشر عنها” او تحكي مع الشرطة.
شفت الفرق بين بابا علمني اطير مثلك و بين الحقووووووني!!!!! يا شرطة يا عالم يا ناس!!!
الطفل الصغير و عقله اللي اقرب لعقل العلماء منا احنا كبالغين
بشوفك الصبح و انتا لحيتك منبزة و بعدين بيستغرب من شفرة الحلاقة العجيبة
اللي بتستعملها عشان يروح الشعر, بيقولك من شو مصنوعة؟ طيب معجون الحلاقة
من شو بيتكون؟
و ليش لما ابوس بابا الصبح و اقولو صباح الخير بيكون شكل…..
ولما يستعمل هاي الالة العجيبة و يبوسني و يقولي ديري بالك على حالك و
يودعني على المدرسة بكون شكل تاني مختلف
يعني حتى الشغلات الصغيرة ما بدي اعطيك امثلة على الطيارات و
لا الادوية و السيارات او الكمبيوترات و باقي الشغلات. اللي اذا استعملت
عقل الولد الصغير فيها راح تضلك تسأل و تبحث حتى تعرف كل اشي عنها!
يعني لا تستخف بعقل الطفل انا بتمنى يكون عندي عقل طفل.
بترجاكم خلي ولادكم و اخوانكم الصغار و كل الاطفال يلعبو
يكتشفو و كمان يسألو. ساعدوهم ابحثو معاهم و مش بس هيك علموهم و اتعلمو
منهم و هاد اهم اشي اتعلمو منهم!.
افتحولهم مجال للتفكير
خليهم يدعولكم لما تكبرو و يشكركم على حسن التربية و التعليم
خلي الجيل اللي جاي يكون احسن منا خليه يرفع راسنا و يطور
بلدنا و يصير العالم كله يتمنى يحصل على الخبير الاردني ” اللي يمكن يكون
ابنك او بنتك” عشان يعمل اعادة هيكلة للدولة الاوروبية الفلانية.
و يصير الاردن يصنع كل اشي و يصير العالم لما يشوف “صنع في الاردن” يشتروها و همه مغمضين
*بعض الافكار مقتبسة بتصرف من كتاب عالم صوفي للكاتب جوستين جاردر
ارجو ذكر المصدر عند النقل